ఢిల్లీ ముఖ్యమంత్రి అరవింద్ కేజ్రీవాల్, జార్ఖండ్ మాజీ సీఎం హేమంత్ సోరెన్లను అరెస్ట్ చేసేందుకు కేంద్రంలోని బీ.జే.పీ. ప్రభుత్వం ఏజెన్సీలను దుర్వినియోగం చేసిందన్న ఏ.ఏ.పీ. ఆరోపణలపై రక్షణ మంత్రి రాజ్నాథ్ సింగ్ స్పందిస్తూ.. ఈ నాయకులకు న్యాయస్థానాలు ఎందుకు ఉపశమనం కల్పించడం లేదని ఆశ్చర్యాన్ని వ్యక్తం చేసారు. దేశ ప్రజలను ప్రతిపక్షాలు తప్పుదోవ పట్టిస్తున్నాయని రాజ్నాథ్ సింగ్ ఓ ఇంటర్వ్యూలో ఆరోపించారు.
ఇలాంటి వ్యాఖ్యలతో తప్పించుకోవచ్చని ఎవరైనా భావిస్తే అది సాధ్యం కాదని ఆయన అన్నారు. బీ.జే.పీ. కి వాషింగ్ మెషిన్ ఉందన్న కాంగ్రెస్ పార్టీ ఆరోపణపై కూడా రక్షణ మంత్రి స్పందించారు. ఇది ఇతర పార్టీల నాయకులను అధికార పార్టీలో చేరిన తర్వాత “క్లీన్” చేస్తుంది అన్నారు. మన వల్లే అరవింద్ కేజ్రీవాల్ జైలుకు వెళ్లారని భావించినా.. ఆయనకు ఎందుకు ఉపశమనం లభించడం లేదు? అని ప్రశ్నించారు.
కోర్టులపై కూడా నియంత్రణ తీసుకున్నామా? ఈ వ్యక్తులు ఏమి చెప్పాలనుకుంటున్నారు? మేము కోర్టులను కూడా స్వాధీనం చేసుకున్నామని చెప్పే ధైర్యం వారికి ఉండనివ్వండి.. అది సాధ్యమేనా? అని రాజ్నాథ్ సింగ్ అన్నారు. ఎన్ఫోర్స్మెంట్ డైరెక్టరేట్, సీ.బీ.ఐ., ఆదాయపు పన్ను శాఖ తమ పని తాము చేసుకుపోతున్నాయని సింగ్ అన్నారు. నిరాధార ఆరోపణలతో తమ నేతలను జైలుకు పంపిస్తున్నారని ప్రతిపక్షాలు భావిస్తే కోర్టుల నుంచి రక్షణ పొందవచ్చని అన్నారు.
